Archive Page 2

كتاب الاغاني .. لكازانوفا المتفاني


دايما دايما .. رح تطلعي انت و كازانوفا بتحبوا نفس المطربين و الأغاني .. مين ما كان هالمطرب او  المطربة .. ليه بقا ؟  لانو كازانوفا  ملم بكل أهل الفن  ليه ملم .. لانو هيدول ادوات  الشغل يعني لزوم  الاصطياد .. وخدلك على تكرار صدف .. شو هالصدفة بتحبي  هالمطرب وانا بحبه شو هالصدفة بتحبي هالغنية .. و هو بيحبها ..

حكمة عامة : بس تتكرر الصدفة 3 مرات بتبطل صدفة ..

ايه فرح تلاقي كازانوفا بيحب كل الفنانين و انواع الفن من  زياد الرحباني و مارسيل خليفة و  فيروز و ام كلثوم وهييييييييييييييييييييك مرورا بكل الفنانين العاطفيين  “تامر – وائل – فضل ” و انتهاءا باكتر الفنانين صرعة ..

ايه بس بعدين بس توقعي بالغرام رح يرجع لمزاجه الموسيقي العادي اللي بيحبه هو  عنجد و ممكن يسايرك مرات .. و انت ما رح تنتبهي كتير لانو مراية الحب رح تكون عندك عميا كتير كتير  ..

مع الاعتذار للاصفهاني *

العبارة الشهيرة ” تذكرتك”


–          كنت عم اشرب “قهوة –نسكافيه – عصير – زنجبيل .. الخ ”  اليوم الصبح و تذكرتك و تمنيت لو  انك موجودة

–          هيدي الغنية كل كلمة  فيها بتذكرني فيكي ” بنرجع بعدين لقصة الاغاني

–          كل ما افتح صفحة من صفحات الكتاب بتطلع صورة وجهك و بتذكرك ..

طبعا  حتى لو ما بيعرف الشب شو بتحب البنت او شو بتكره بس هم – البنات – بشكل عام بيحبوا المناظر الطبيعية ” ورد – طبيعة – غروب –شروق – بحر – شجر  ” ما بدنا نقلبها درس جغرافيا   المهمممممممم ..  بتيجي العبارة  الخطيرة للشب بهالمناسبة انو ” مناسبة حبك للتضاريس الطبيعية “

–          كنت  عالبحر .. و تذكرتك وقلت لو انك هون و صورتلك ياه

–          كنت “ابصر وين ” و شفت هالوردات .. وصورتلك ياهم ..

يعني على هالشكل بيكون موضوع تذكرتك  .. ايه  عفكرة رح يكون عندك البوم صور مليء بالمناظر الطبيعية الجميلة ..

من حبك ما عم نام الليل

كازانوفا بيسهر بيسهر كتير .. طبعا قبل ما يتعرف عليكي يا عزيزتي كان يسهر من  الهم و القهر و الزعل عندو  ارق مزمن  ما انا وانت اتفقنا انو الاخ منكسر خير الله .. لما اجيتي انتي لونتي حياته وصار يسهر ليفكر فيكي ويحلم فيكي باليقظة ويحكي معك  ، عفكرة بيكون عم يسهر ليطق حنك مع البنات  عالفيس بوك او  ال Msn او حتى التلفون .. و عليه  يا بنتي  .. بينام بالنهار عادة و بيسهر بالليل و بينطبق عليه القول :

من حبك ما عم نام  الليل بس عم نام بعد الضهر ..

هو و الثقة وهواكِ


“بتعرفي اديه انا عندي اصدقاء بس انت ِ الوحيدة اللي بوثق فيها “

ياويلي ملا جملة لازم تخترق القلب اختراق .. طبعا  جملة حلوة و مؤثرة بس لازم تكون بمحلها .. بمحلها يعني بوقتها يعني بعد ما يكون في اخد و عطا وتجارب و انو مجرب هالشخص بشي سر لحتى وثقت فيه .. بس كازانوفا بيقول هالحكي للصبية من اول او تاني لقاء .. وثق فيها و ارتاح فجاة و فجاة خبرها كل قصة حياته .. اللي طبعا هو ما قايلها لحدا من  قبل و اللي هي  اول مرة بيحكيها لانو ما بيعرف كيف  قدرتي تخليه يحكي قصة حياته و يوثق فيكي هالثقة العمياء ..

بالعقل تقبريني .. بالعقل .. كيف وثق فيكي و حكالك كل اسراره وهو  هيدي اول مرة بيحكي معك مدري تاني مرة ..

صفات كازانوفا


حزين و مكسور و وحيد  على طول .. دائما وحيد ، يعني مستحيل تلاقي في حدا بحياته مع انو كازانوفا  شخصية و حلو و مثقف و اجتماعي و عندو عدد مهول من الاصدقاء بس المسكين عطول وحيد و مكسور .. و هالانكسار هيدا ما بيظهر الا الك بتحسي هيك يا سبحان الله بيروح فجاة كل المرح و الهضامة اللي كانت من شوي ادام كل هالناس و لبس الكآبة لبس  .. حرام ..

غامض .. انو كتير غامض صعب بتعرفي عن حياته غير اللي بيخبرك ياه هو .. صح هو اجتماعي و عندو رفقات بس حتى رفقاته ما بيعرفوا عن حياته غير شو بيقول هو المهم يا اخواتي مافي وضوح بالمرة ..

لسانه حلو .. يعني  حلو زيادة ياريت بس حلو زيادة لا هو   قطر   .. و بيفاجئك عطول بلسانه الحلو ..