Archive for the 'يوميات' Category

خط الرجعة

في متل مشهور بيقول  لما بيفلس التاجر بيفتش بدفاتره العتيقة  ، وهون عنا كازانوفا كمان عندو دفاتر عتيقة مسجل فيها كل البنات و العلاقات اللي مر فيها عبر الايام  ممكن يكون هالدفتر حقيقي و ملموس و ممكن لا يكون  عبارة عن شوية خلايا بالذاكرة ، هلق بموضوع سابق اتفقنا انو  لازم  البنت اللي بدو يتركها كازانوفا تضل صديقته و ما يكون في اي مشاعر سلبية و ما يكون في اي  خسائر خلال انهاءه العلاقة  و السبب الرئيسي هو  حفظ خط الرجعة.

بتمر ايام  ع كازانوفا  هيك بيأفلس فيها على صعيد العلاقات و بهالوقت عنجد بيكون وحيد بس بيقول المتل المصري يموت الزمار و اصابيعه بتلعب يعني بيكون كازانوفا  تعود على انو  دايما حياته ملئية بالعلاقات و النساء اللي عم يركضو وراه ” اخذين بعين الاعتبار انو  هول النساء بيضل ادامهم وحيد كما ذكرنا سابقا ” المهم  بحالات الافلاس  هيدي و شح العلاقات بيعمل متل ما بيعمل التاجر بالزبط  بيرجع لدفاتره العتيقة و بينقي اكتر بنت او بنات  متعلقين فيه و بيجرب يرجع المي لمجاريها باعتبار انو هو ما قادر يعيش بلاها و ما عارف كيف هيك خلاها تمضي في طريقها وتروح من ايده و اديه كان غبي  و حمار  “اجلكم و اجل القارئين جميعا ” لما خلاها تتالم و تتوجع بسبب  تركه الها و كيف انو لازم يعيش هو وياها اللحظة وما يفكر بالمستقبل متل ما عمل اول مرة وتركها لانو خاف ع مستقبلها معه  .. الخ الخ الخ

اكيد انتو  قاعدين عم تستغربو انو مستحيل هيك شي يصير و انو مستحيل ترجع هيك علاقات و انو اكيد البنت لن تقبل البتة انو ترجعله  اد ما حاول ايه لا امبلا بترجع  و بتعود  غالبا لانو البنات اللي  تركهم مقتنعين  انو تركهم  و هو ما زال بيحبهم  و انو هالشي صار غصب عنه  “التركة قصدي ”  الرجاء مراجعة موضوع  كوني صديقتي السابق  ،  ايه اما هو فـبترجع العلاقة يوم يومين   او اسبوع او اسبوعين  ماكسيموم  لحين ظهور حدا جديد عالخط حدا لسه ما مسجل بالدفاتر و ممكن يكون صيد جيد لصاحبنا كازانوفا

 

*. ملاحظة بعتذر من  قراء المدونة لانو الي زمان ما كتبت بس ظروف  و ان شاء الله هلق بترجع المدونة متل الاول واحسن ..

Advertisements

عزيزة .. قريبة .. غالية … اخت الخ الخ الخ

بهالموضوع حابة نوه تنويه ، يعني يمكن كان لازم نحكي عن هالملمح من شخصية كازانوفا قبل هلق ..بس يعني هم التدوينات كلهم مو بالترتيب ..

لحفظ مكانته كازانوفا ادام  المجتمع النسوي ” مكانته كأعزب طبعا ” ، بيقوم باستخدام احد الاسلوبين التاليين اذا كان بدو يعرف عن “حبيبة ” هو على علاقة معها  ادام المجتمع المحيط به بحيث يكونوا البنات كلن بنفس المكانة و ولا وحدة منهن تحس انو احداهن احسن منها .. و انو  في شي شخصة  اهم منها .. او مميزة اكتر منها يعني فينا نقول هالاسلوبين بيساعدو كتير بالتخفيف من نوبات الشك و الغضب و وجع الراس لكازانوفا العزيز

اسلوب رقم واحد ..

انو كل البنات عزيزات و مقربات وغاليات و قريبات فقط لا غير رغم انو ممكن يكون على علاقة معهن و  حب و غرام وكل شي ولكن بقلب المجتمع “اي على صفحات الفيس بوك و في المقاهي و الجامعة و جلسات الاصدقاء”  فهي اما عزيزة او قريبة او  غالية او مقربة لا اكثر ولا اقل هيك ما بتشك الحبيبة بالاخريات “لانو الكل على مسافة واحدة منه ” بس بتتضايق شوي لانو  هي حبيبة سرية بس مش كتير لانو  كما اسلفنا بتدوينة سابقة “هل حبنا غلطة “ بيكون هو منبهها انو نحنا لازم نكون سريين ..

اسلوب رقم اتنين ..

انو كل البنات عمره و حياته و حبيباته  ، فهو  لا ينفك ولا يفتأ عن استخدام هالكلمات للبنات حتى لو كان من  3 دقايق تعرف عليها حبيبتي – حياتي – روحي عمري وهكذا دواليك .. هلق رح تنزعج الحبيبة من هالحركة شوي انو كل البنات عم يقولن حبيبتي  ولكن الشك عندها رح يكون تحت مستوى الخطر بما انه يقول للكل  كما اسلفنا قبل شوي اذا ولا وحدة منهن حبيباته .. حسب ظنها طبعا  ..

الحل الامثل لهيك حالة  انو شو تطالب الحبيبة قصدي انو ماااااااا يقول لحدا حبيبتي روحي و عمري و ما تكون هي متل التانيات عزيزة و  قريبة و غالية .. ” يعني بالعربي الفصيح يحدد موقفه اكتر  ..

ايه و  بس .. اودعناكم ..

كوني صديقتي


عادة  كازانوفا بيضل كسبان ، حتى لو بدو يترك  البنت انو مل منها وهيك بيضل كسبان  على نسق ” كم جميل لو بقينا اصدقاء ” يعني هيك هو مرهف من  جماعة  كن صديقي ، المهم  أخونا بس يكون مل من البنت و ضاقت اخلاقه و بطلت تعجبه او  انو خلص كسرلها راسها يعني لحيالله سبب من هالسببات   بيجي هيك و هو مدبل عيونه  بعد عدة ايام من المعاملة السيئة للبنت  طبعا لانو كان  عم ياخد قرار صعب عليه كتير بيجي هيك و بيقولها ببراءته  المعهودة انو هي بتستاهل احسن منه و هو مستحيل يتحمل انو هي تضحي مشانه حتى لو حياته منيحة و مستقرة ومستقبله مضمون و شغله كويس واهله مناح وكل شي بس بهاللحظة  بالذات بيحيل بكل شيء ادام هالصبية الى سواد  و انو هو  الاستمرار بينها وبينه مستحيلة و بيحبذ وبيفضل انو يتركها  مشانها و اذا بيضلوا اصدقاء يطمئنوا على بعض من فترة لفترة ” حفظ خط  الرجعة هيدي موضوع لحاله بعدين ”  المهم يبقوا اصدقاء لانو هو  ما تاركها لانو كارهها او شي لا مشانها .

احد اهم  سببات التركة

من فترة كان احد اشهر و اهم اسباب انو كازانوفا يترك الصبية  “فيكم تقولوا موضة يعني ” ايه انو  طلع معو مرض خبيث  .. او عمل تحاليل و ناطر النتيجة و عالاغلب رح  يطلع معه مرض خبيث فمشان هيك بدو يتركها لانو ما بيحب الشفقة ابدا و ما بيحب حدا يتعذب كرماله .. المهم بيتركوا و هيك و بيضل هو  يأسان من  الحياة اسبوعين ماكسيموم بعدين بيرجع لحياته طبيعي  .. ايه بس ما بيرجعوا لبعض لانو ببساطة راح عندو الاحساس بالفترة اللي قضاها بين الحياة و الموت و  هي صارت هلق صديقة عزيزة و غالية ..

هل حبنا غلطة ؟


كازانوفا المرهف الحساس اللي ما بيفوت لحظة ولا دقيقة ليأكد للحبيبة انو بيموت فيها جدا المهم هالشخص  بيطلب دائما من حبيبة القلب انو  علاقتهم تكون  سرية وما حدا يعرف فيها ابدا ابدا لا انتيماتها ولا انتيماته  .. ما حدا يقولي يمكن و ربما ولذلك ايه ..  رح كمل انو  انا بفهم  واحدة و وحدة ما يخبروا حدا اول فترة لحتى يدرسوا بعض ، بفهم انو تنين مش متأكدين من حبن لبعض يقولوا نحنا لسه مافي علاقة بيننا ، بفهم انو اهلها صعبين شوي ما بدها يعرفوا لحتى يقدر كازانوفا ياخد خطوة جدية بهالمجال بس انو مرات  رفقاتهم عالقليلة  بيعرفوا يعني مش ضروري ابدا تنطبل الدنيا بس عالقليلة القراب ..   انو ولو ما هو بيأكد بشكل مستمر انو بيحبها و انو حبه الوحيد وكل شي  ليه بيطلب هالسرية .. انو طيب  هي لازم تشك على قليلة  شوي  انو ليه ما بدو حدا يعرف عم يعملوا شي غلط مثلا ؟ المهم  لأنو لازم كازانوفا يضل تحت نصيبه  و كما اسلفنا سابقا  هو وحيد .. و أي  دخان يحوم حواليه انو مرتبط او  على وشك يكوّن علاقة او اي اشارة بتلتقط بالهواء انو هو بعلاقة  رح تهدد  مكانته  في مجتمع الصبايا  كأعزب و صياد او حتى صيد “البنات مش قلال ع فكرة ” ..

في خدمة كازانوفا Technology

طبعا بعد انتشار الmsn و ال facebook و ال twitter و هالحركات كلها .. صار في تطورات يجب ان يجاريها كازانوفا عصره .. و يحدث المناهج و المقررات اللي عندو .. و الشخص بكل الاحوال لازم يكون ابن عصره .. المهم
في اشيا بسيطة بتروح هيك عن البال خلينا نضوي عليها
facebook status :
بما انو كتاب الوجه عادة بيحوي عدد كبير من الاصدقاء .. احيانا ما بيكونوا عالmsn ” الماسنجر مرحلة تانية تلي مرحلة الفيس بوك ” .. فالغموض الفيس بوكي مطلوب .. و الstatus هو طريقة لتوصيل رسالة او اكتشاف صيد او اي نوع من هالشي ..
اكتشاف اذا “الصبية مهتمة -يعني شبه دالقة حالها مرات ” طبعا الاهتمام هو اول طريق الصيد : يتم عن طريق وضع status غامضة .. تستدعي الصبية انو تسأل : شوفي ؟؟؟؟ ، شو قصدك ؟؟؟ ، مين المقصود ؟؟؟؟ و هون لقطنا طرف الخيط ويتوالى بعدها استخدام ال status .. و التالية هي status كآبة و حزن .. بتخلي الصبية تهتم اكتر و تنشد اكتر لتنقذ كازانوفا المسكين من وضعه
وتتوالى استخدامات ال status لايصال الرسائل ..
msn personal message :
هون بقا غير الناس الموجودين عالMsn لدى كازانوفا متل اللي موجودين على تلفون موبايله صاروا خصوصيين اكتر ربما يعني وقعوا و حبوه .. رح يكون التالي ..
حب : لما بيكون متصالح وعلى حالة وفاق مع كل الصبايا
كآبة وحزن وهالاشيا : لما بيكون في حالة مشاكل مع اغلبية الصبايا اذا ما كلن
طيب اذا متخانق مع مجموعة و متصالح مع مجموعة شو الحل ؟ في حلين
1. بيتجوز القضية : شو المقصود يعني بتصير الpersonal message اللي عندو كلها عن الوطن و الارض و القضية و الله و الاقتصاد و العائلة الخ الخ الخ .. يعني حسب شخصية كازانوفا ..
2. بيصمت ما بيحط شي ليه ؟ : ليقول للي متصالح معهن : الصمت في حرم الجمال جمال ، و للي متخانق معهن : انو اد ما الصدمة كبيرة الصمت سيد الموقف ..

التقل صنعة


عزيزتي الفتاة .. و عزيزي الشاب كمان .. التقل صنعة هادا المتل متداول ومعروف .. بالنسبة لكازانوفا يعني التقل شعار لا يمكن الاستغناء عنه و البنت بتتعذب معه كتير اد ما متقل حاله .. طبعا هو اول شي بيندلق عليها شي يومين تلاتة  بيهلكها للبنت  اتصالات و حكي حكي حكي .. بعدين فجاة ولا بيعود بيسأل و على البنت بهذه الحالة انو تسال عنه و تلحقه و تدلق حالها عليه و هو بيضل متقل حاله و حتى لو علقت الصبية بيضل حامل نفس الشعار وبتضل هي اللي بتلحق و بتصالح و كل شي  ، هلق الحق معه  و ما تنظرولي  هالنظرة منك الها الها .. الحق معه لانو  البنات سمحوله يعمل فيهم هيك ابصر هو بينقيهم نفس النوع وقت بيصطادهم او شخصيته هو بتفرض حالها عليهم و بيصيروا البنات بس بدهم يرضى .. انا برجح  النوع الاول  انو  اساسا بينقيهم من نفس النوع مشان وجع الراس .. حبيبتي اذا وقعتي هيك وقعة و كنتي عم تركضي وراه فيكي تفيقي قبل فوات الاوان .. و تثأري لكرامتك شوي “مشان كرامتك عالقليلة ” .. و  ما تعطيه وش ليعرف غلطاته ..  ايه وهيك ..

كتاب الاغاني .. لكازانوفا المتفاني


دايما دايما .. رح تطلعي انت و كازانوفا بتحبوا نفس المطربين و الأغاني .. مين ما كان هالمطرب او  المطربة .. ليه بقا ؟  لانو كازانوفا  ملم بكل أهل الفن  ليه ملم .. لانو هيدول ادوات  الشغل يعني لزوم  الاصطياد .. وخدلك على تكرار صدف .. شو هالصدفة بتحبي  هالمطرب وانا بحبه شو هالصدفة بتحبي هالغنية .. و هو بيحبها ..

حكمة عامة : بس تتكرر الصدفة 3 مرات بتبطل صدفة ..

ايه فرح تلاقي كازانوفا بيحب كل الفنانين و انواع الفن من  زياد الرحباني و مارسيل خليفة و  فيروز و ام كلثوم وهييييييييييييييييييييك مرورا بكل الفنانين العاطفيين  “تامر – وائل – فضل ” و انتهاءا باكتر الفنانين صرعة ..

ايه بس بعدين بس توقعي بالغرام رح يرجع لمزاجه الموسيقي العادي اللي بيحبه هو  عنجد و ممكن يسايرك مرات .. و انت ما رح تنتبهي كتير لانو مراية الحب رح تكون عندك عميا كتير كتير  ..

مع الاعتذار للاصفهاني *


Protected by Copyscape Duplicate Content Checker

free counters